Në pikën kufitare në Vërmicë, zyrtarët doganorë kanë zbuluar një sasi të konsiderueshme mallrash të padeklaruara gjatë kontrollit të detajuar të një automjeti.

Mallrat, të vendosura në pako të ndryshme në bagazhin dhe ulëset e pasme të veturës, përfshinin çanta krahu për femra dhe pantallona për meshkuj – gjithsej rreth 900 copë.

Pala nuk kishte paraqitur as faturë dhe as ndonjë dokument tjetër përcjellës për mallrat e hasura.

“Ndaj palës është iniciuar procedurë për kundërvajtje doganore sipas KDAK-së, ndërsa malli është ndaluar deri në përfundimin e procedurave përkatëse. Dogana e Kosovës vazhdon me përkushtim zbatimin e ligjit dhe kryerjen e kontrolleve në pikat kufitare, me qëllim të parandalimit të kontrabandës dhe mbrojtjes së interesave ekonomike të vendit”, thuhet në njoftim./Arbresh.info