Zgjedhja e Dimal Bashës si kryetar i Kuvendit të Kosovës ka qenë një ndër temat më të diskutueshme në skenën politike.

Pas tij, si nënkryetare e parë u zgjodh Albulena Haxhiu, e cila më parë kishte tentuar disa herë të zgjidhej kryetare e Kuvendit, por nuk kishte arritur të sigurojë numrat e nevojshëm për këtë post.

Pas zgjedhjes së Haxhiut, janë shfaqur polemika të shumta lidhur me mundësinë që Dimal Basha të japë dorëheqje nga posti i kryetarit të Kuvendit, ndërsa këtë pozitë ta marrë Albulena Haxhiu.

Lidhur me këtë, Vullnet Bugaqku, hulumtues i lartë në KDI, në një prononcim për Arbresh.info ka sqaruar se:

“Rregullorja e Kuvendit parashikon që nënkryetari e zëvendëson kryetarin vetëm në rast mungese të tij. Nëse kryetari i Kuvendit nuk e ushtron më funksionin e tij, zgjedhja e kryetarit të ri duhet të bëhet sipas procedurës së parë të zgjedhjes, që do të thotë se grupi parlamentar më i madh duhet të propozojë një kandidat të ri, i cili më pas i nënshtrohet votimit”, tha ai.

Këtë e përcakton edhe Rregullorja e Punës së Kuvendit (Neni 15), sipas të cilit:

Kryetari i Kuvendit mund të japë dorëheqje, të cilën duhet ta paraqesë Kuvendit për njoftim. Deri në zgjedhjen e Kryetarit të ri, detyrën e Kryetarit e ushtron përkohësisht një nga nënkryetarët.”

Deri në zgjedhjen e Kryetarit të ri, njëri nga nënkryetarët e Kuvendit merr përsipër detyrën e Kryetarit përkohësisht (sipas Kushtetutës, neni 67).

Ndryshe, Deputeti i Lëvizjes Vetëvendosje, Dimal Basha, është zgjedhur kryetar i Kuvendit të Kosovës.

Pas votimit të mbajtur në seancën e sotme, ai siguroi shumicën e nevojshme të votave, duke marrë 73 vota për, 30 kundër dhe 3 abstenime, duke u konfirmuar kështu në postin më të lartë të legjislativit./Arbresh.info