Ministri i Infrastrukturës dhe Transportit, Dimal Basha, ka realizuar një vizitë pune në terren përgjatë aksit rrugor Kijevë–Pejë, një projekt me rëndësi të veçantë për zhvillimin ekonomik dhe përmirësimin e qarkullimit në vend.

Sipas njoftimit, gjatë vizitës, ministri u informua nga afër për ecurinë e punimeve në segmentet kryesore të projektit, duke zhvilluar takime me përfaqësues të operatorëve ekonomikë dhe mbikëqyrësit e punimeve.

Në fokus të diskutimeve ishte dinamika e realizimit të punimeve, respektimi i afateve të përcaktuara, si dhe adresimi i sfidave që paraqiten në terren.

“Ministri kërkoi angazhim të shtuar nga të gjithë operatorët e përfshirë, përmbushje të plotë të obligimeve kontraktuale dhe realizim të punimeve në përputhje me standardet e kërkuara të cilësisë”, thuhet në njoftim.

Tutje theksohet se projekti i rrugës nacionale N9 Prishtinë–Pejë mbetet një nga projektet prioritare të ministrisë, me ndikim të drejtpërdrejtë në zhvillimin ekonomik dhe përmirësimin e lidhjes ndërmjet rajoneve të vendit.