Daçiq: Serbia s’do ta njohë kurrë Kosovën, propozimi i Vuçiqit u keqkuptua

22:36 | 2 Gusht 2017
Arbresh.info

Ministri i Jashtëm serb, Ivica Daçiq, ka hedhur poshtë pretendimet se Serbia dëshiron ta njohë pavarësinë e Kosovës.

Në një intervistë për ‘RTS’, ai ka thënë se disa e kanë keqkuptuar thirrjen e presidentit serb, Aleksandar Vuçiq, për dialog të brendshëm për Kosovën, duke e interpretuar si thirrje për njohje, por se Serbia kurrë nuk do ta bëjë një gjë të tillë.

“Ata mendojnë se kjo çështje duhet të zgjidhet në mënyrë që Serbia në fund të kapitullojë. Serbia nuk do ta bëjë këtë. Ajo është konstruktive dhe bën thirrje për dialog, jo për shkak se ajo është e keqe por është e fortë dhe ka ide konkrete”, ka thënë Daçiq, transmeton lajmi.net.

Ai ka theksuar se ndjen turp për ata që mendojnë se Serbia do të pendohet dhe do ta njohë pavarësinë e Kosovës.

Po ashtu, Daçiq deklaroi se politika e Clintonit është ende gjallë, mirëpo kohët kanë ndryshuar./arbresh.info/