Beqiri e quan ‘akt banditësh’ sulmin ndaj veturës së tij

09:48 | 7 Mars 2016
M. A.

Shefi i Grupit Parlamentar të LDK-së, Ismet Beqiri, të cilit sot rreth orës 4 e 30 të mëngjesit i është djegur vetura, ka thënë se ky është akt banditësh, i cili nuk mundet t’i ndalë në punën e tyre institucionale.

Beqiri i ka thënë KosovaPress-it se dyshimet e para tregojnë se vetura i është djegur me koktej molotovi.

Ai ka thënë nuk dëshiron ta paragjykojë autorin, por kërkon nga organet e drejtësisë që t’i zbardhin këto raste.

“Fatkeqësisht ky sigurisht është një akt i banditëve … dhe përkundër kësaj askush nuk mund të na ndalë në punën tonë institucionale për të mirën e vendit dhe nuk është e imja të paragjykoj por vërtet organet e drejtësisë duhet ti zbardhin këto raste sepse nuk është rasti i parë. Qytetarët po shqetësohen sepse po rrezikohet jeta e tyre, se realisht unë banoj në një vend ku ka edhe shumë banorë të tjerë”, ka thënë Beqiri.