Pas vendimit zyrtar të Qeverisë, është bërë pranim-dorëzimi i postit të ministrit të Brendshëm. Bejtush Gashi, i cili ishte emëruar vetëm pak muaj më parë i ka liruar vendin ministrit të ri, Ekrem Mustafës.

Në Ministrinë e Punëve të Brendshme, Bejtush Gashi ka dorëzuar detyrën e Ministrit të Punëve të Brendshme, tashmë të emëruarit të ri në këtë detyrë Ekrem Mustafa, transmeton Express.

Gjatë ceremonisë së pranim-dorëzimit, të dy bashkëbiseduesit diskutuan për punën dhe çështjet kryesore që kanë të bëjnë me Ministrinë e Punëve të Brendshme.

Me këtë rast, ish-ministri Bejtush Gashi i ka uruar Mustafa detyrën e re të ministrit të Punëve të Brendshme, thuhet në njoftimin e kësaj ministrie.

Në qeverinë Haradinaj deri tash janë ndërruar tre ministra të Brendshëm. I pari, Flamur Sefaj u shkarkua nga kryeministri Ramush Haradinaj pas skandalit me deportimin e gylenistëve.

Bejtush Gashi, i ardhur në këtë pozitë pas Sefajt, sipas partisë së tij, AKR’së, është shkarkuar për mungesë përformance. Zyrtari i lartë i partisë, deputeti Labinot Tahiri, ka kërkuar që të ketë ministër nga Ferizaj. Ai ka lobuar që këtë pozitë ta zë Ekrem Mustafa. /Express/