Agjencia e Ushqimit dhe Veterinarisë (AUV) ka hequr një pjesë të ndalimit të importit të shpezëve dhe nënprodukteve të tyre nga Gjermania.

AUV ka njoftuar se ka bërë plotësim-ndryshimin e vendimit për ndalesën e importit të shpezëve dhe nënprodukteve të tyre nga Gjermania, duke shfuqizuar masën e vendosur më 30 tetor 2025.

Sipas njoftimit, vendimi është marrë pas vlerësimeve më të fundit ndërkombëtare dhe kombëtare, përfshirë raportin e Organizatës Botërore për Shëndetin e Kafshëve (WOAH), raportin e Komisionit Evropian të datës 28 tetor 2025 dhe raportin e autoriteteve kompetente gjermane të datës 12 nëntor 2025.

Sipas AUV-së, importi i shpezëve dhe nënprodukteve të tyre nga Gjermania lejohet, përveç nga zonat ku është konfirmuar prania e gripit të shpezëve me patogjenitet të lartë, HPAI–H5N1. Në këto zona përfshihen: Lower Saxony, Bavaria, Brandenburg, Baden-Württemberg, North Rhine-Westphalia, Thuringia, Mecklenburg-Western Pomerania dhe Schleswig-Holstein

Nga këto rajone ndalohet importi i shpezëve të gjalla, mishit të shpezëve dhe nënprodukteve që kanë origjinën në fermat e prekura nga virusi.

AUV bëri të ditur se ndalesa për zonat e prekura hyn në fuqi menjëherë dhe do të mbetet aktive deri në vlerësimin e radhës nga institucionet kompetente vendore dhe ndërkombëtare.

Institucioni theksoi se do të vazhdojë monitorimin e situatës epidemiologjike dhe bashkëpunimin me partnerët relevantë për të parandaluar përhapjen e sëmundjes, ndërsa publiku dhe operatorët ekonomikë do të njoftohen me kohë për çdo ndryshim të mundshëm./Arbresh.info