Deputeti i pakënaqur i Vetëvendosjes, Haki Abazi, ka kritikuar Projektligjin për Zgjedhjet e Përgjithshme.

Sipas Abazit, ndër të metat që ka ky Projektligj është kuota gjinore e mbetur 30% dhe mos votimi direkt i Presidentit/es të shtetit, raporton Arbresh.info.

“Si luftojmë ne për barazi gjinore kur e mbajmë kuotën gjinore të UNMIK-ut në zgjedhje, 30% për gratë. Ajo duhet të bëhet 50%, sepse në të kundërtën ne po diskriminojmë 50% të popullatës. Pse nuk është bërë votimi direkt për Presidentin e Republikës, ai apo ajo nuk duhet të votohet nga deputetët, dhe ky ka qenë premtim i Qeverisë para se të vinte në pushtet”, tha Abazi në Kuvend.

Ai kritikoi edhe fjalimin e kryeministrit Kurti për lehtësimin e votimit për diasporën, duke thënë se ai këtë e bën vetëm për vota.

“Kryeministri e përmendi diasporën meqë ka nevojë për vota, sepse pas zgjedhjeve ne harrojmë kush është diaspora e krejt investitorët nga ta. Kjo është bërë vetëm sa për të thënë që kemi konsensus, por jo që ka diçka në përmbajtje”, tha Abazi./Arbresh.info.