Sot mblidhet Qeveria “Kurti 3”, shqyrtohen masat për çmimet e produkteve bazë

07:28 | 3 Prill 2026
E.K

Qeveria e Kosovës do të mbajë sot një mbledhje, rreth një orë e gjysmë para nisjes së seancës së jashtëzakonshme të Kuvendit.

Në këtë mbledhje, ekzekutivi pritet të shqyrtojë projektligjin për masat e përkohshme ndaj produkteve themelore në raste të veçanta të destabilizimit të tregut.

Një ligj i ngjashëm, që parashihte vendosjen e çmimeve tavan në mandatin e kaluar, ishte rrëzuar nga Gjykata Kushtetuese.

Ndërkohë, si pasojë e situatës në Lindjen e Mesme, që nga muaji shkurt në Kosovë është vërejtur rritje e çmimeve të naftës dhe disa produkteve të tjera bazë.

Përveç kësaj pike, në rendin e ditës të mbledhjes së Qeverisë janë përfshirë edhe çështje të tjera.

Sa i përket rritjes së çmimit të naftës, sot Kuvendi i Kosovës do të mbajë gjithashtu një seancë të jashtëzakonshme, të thirrur nga LDK-ja dhe të mbështetur nga PDK-ja dhe AAK-ja.