Ministri i Shëndetësisë Rifat Latifi ka udhëtuar sërish për në Shtetet e Bashkuara të Amerikës. Latifi ka udhëtuar në Nju Jork të premten dhe pritet të kthehet në javën e parë të janarit, shkruan Gazeta Shneta.

Udhëtimin e tij e ka konfirmuar edhe këshilltari Drin Podrimçaku. “Po ka udhëtuar dhe kthehet më 3 janar”, ka deklaruar ai. Podrimçaku ka thënë se ministri ka udhëtuar për arsye personale.

Latifi është emëruar ministër i Shëndetësisë më 16 nëntor të këtij viti. Kjo është hera e dytë që ai kthehet në SHBA për çështje personale.

Pas rikthimit në herën e parë, Latifi në një deklaratë për Gazetën Shneta pati thënë se tanimë është zhvendosur në Prishtinë për të filluar punën si ministër.

E derisa Latifi gjendet në SHBA, në Kosovë tanimë janë konfirmuar nëntë rastet e para me variantin e ri Omicron. Dy prej këtyre rasteve janë identifikuar si të importuara nga SHBA-ja.