Me 66 vota për, 32 vota kundër dhe 5 abstenime Kuvendi i Kosovës e ka miratuar në parim projektligjin mbi ndarjet buxhetore për buxhetin e Republikës së Kosovës për vitin 2026.

Menjëherë pas votimit të projektligjit për buxhetit në lexim të parë, shefja e deputetëve të Vetëvendosjes, Arbërie Nagavci ka propozuar që shqyrtimi i të njëjtit në lexim të dytë me shmangie nga afatet procedurale.

“Amendamentet në projektligj t’i adresohen komisionit për buxhet deri me 18 shkurt në ora 16:00, komisionet parlamentare deri më 19 shkurt në ora 12 të shqyrtojnë projektligjin dhe raportet me rekomandime ‘ia paraqesin Komisionit funksional për buxhet. Komisioni deri më 19 shkurt në ora 24:00 të paraqesë raportin me rekomandime për shqyrtim të dytë në seancën plenare e shqyrtimi i dytë të bëhet në seancën plenare më 20 shkurt në ora 11:00”, tha Nagavci.

Kundër shmangies nga afatet procedurale për leximin e dytë të projektligjit për Buxhetin ka dalë LDK-ja.

“Sinqerisht nuk po e kuptojmë çka është kjo nguti,. Ju e dëgjuat Hekuran Muratin që tha se ende po punojnë me kontrata të 2020, e janë duke kërkuar të shqyrtojnë buxhetin me procedura të shpejta. Cila është ë kjo nguti se nuk po ju kuptojmë. Jemi kundër shmangies”, tha Bajrami.

Në fund deputetët me shumicë votash miratuan këtë propozim të Vetëvendosjes për shmangie nga procedurat.