Një person humbi jetën dhe dhjetëra shtëpi u përmbytën si pasojë e reshjeve të dendura dhe erërave të forta që goditën Greqinë, ndërsa stuhia Erminio kaloi përmes Athinës dhe disa ishujve në Egje.

Autoritetet njoftuan se kishin gjetur trupin e një burri në qytezën turistike bregdetare të Nea Makri, 35 km në verilindje të Athinës. Mendohet se burri u tërhoq nga rryma dhe mbeti i bllokuar nën një automjet teksa përpiqej të kalonte një rrugë të përmbytur.

Shërbimet zjarrfikëse kanë marrë qindra thirrje për të shpëtuar qytetarë të bllokuar dhe për pastrimin e rrugëve nga pemët e rëna.

Si masë sigurie, autoritetet ndaluan disa tragete që të niseshin nga Porti i Pireut drejt ishujve grekë. Në ishullin mesdhetar të Kretës, qielli mori një ngjyrë portokalli të frikshme të mërkurën, ndërsa erëra të forta sollën pluhur nga Afrika e Veriut, duke ndërprerë fluturimet dhe shkaktuar shqetësime për udhëtarët.

Autoritetet greke paralajmërojnë qytetarët për kujdes maksimal dhe shmangie të zonave të përmbytura deri pas përmirësimit të motit./A2cnn