Deputetja e Kuvendit të Kosovës nga radhët e VV-së, Arbërie Nagavci ka thënë se PDK dhe LDK po flasin të pavërteta në Kuvend.

“Po ju dëgjoj dhe mendoj si mund të flisni të pavërteta këtu. PDK ka insistuar që të trajtohen ligje që i keni propozuar vet e të cilat në mënyrë të argumentuar e kanë rritur shifrën që qeveria Kurti e kishte parashikuar për pakon emergjente, ndërsa ju Gashi keni kërkuar që asgjë të mos trajtohet në seancë deri pas vendimit të Gjykatës Kushtetuese”, ka thënë ajo.

Nagavci më tej ka thënë se qeveria nuk i ka pas 45 vota.

“Ju sot nuk i keni pas 59 as 45 vota, dhe mos flisni për interesin e qytetareve të cilin e keni shkelur dhe deformuar atëherë kur keni rrëzuar qeverinë legjitime të votuar më 6 tetor”, ka shtuar ajo.

Ky diskutim ka ardhur për shkak të rendit të ditës i cili përfshinë disa marrëveshje financiare ndërkombëtare.

Kundër tyre ka dalë edhe PDK, ndërsa pozita ka kërkuar që të votohet pasi sipas tyre do të ndihmojnë në realizimin e pakos së rimëkëmbjes ekonomike.

Kuvendi i Republikës së Kosovës në rendin e ditës së sotme ka disa pika për marrëveshje financiare ndërkombëtare.

• Shqyrtimi i Projektligjit për ratifikimin e Marrëveshjes për financim ndërmjet Republikës së Kosovës dhe Asociacionit Ndërkombëtar për Zhvillim për Projektin e Fuqizimit të Sektorit Financiar,
• Shqyrtimi i Projektligjit  për ratifikimin e Marrëveshjes për Hua ndërmjet Republikës së Kosovës dhe Bankës Evropiane për Rindërtim dhe Zhvillim për Projektin e Zhvillimit të Ujërave të Zeza në Gjilan,
• Shqyrtimi i Projektligjit për ratifikimin e Marrëveshjes për Financimin e Projektit për Kadastër të Patundshmërisë dhe Infrastrukturë Gjeohapësinore ndërmjet Republikës së Kosovës dhe Asociacionit Ndërkombëtar për Zhvillim,
• Shqyrtimi i Projektligjit për ratifikimin e Marrëveshjes ndërmjet Bashkimit Evropian dhe Republikës së Kosovës  mbi pjesëmarrjen e Kosovës në Programin e Bashkimit “Dogana 2020”,
• Shqyrtimi i Projektligjit për ratifikimin e Marrëveshjes ndërmjet Bashkimit Evropian dhe Republikës së Kosovës  mbi pjesëmarrjen e Kosovës në Programin e Bashkimit “Fiskalis 2020”./arbresh.info/