Gjykata Themelore në Gjakovë, Departamenti për Krime të Rënda, ka shpall aktgjykim dënues ndaj të pandehurit P.B., duke e dënuar me dënim unik me 4 vjet e 6 muaj burgim për vrasje në tentativë dhe armëmbajtje pa leje.

Sipas njoftimit të Gjykatës, trupi gjykues i kryesuar nga kryetari Drilon Haraçia, pas përfundimit të shqyrtimit gjyqësor, shpalli aktgjykimin me të cilin i pandehuri u shpall fajtor dhe ndaj tij u shqiptua dënim unik me burgim në kohëzgjatje prej 4 vjet e 6 muaj, raporton “Betimi për Drejtësi“.

“I pandehuri akuzohet se më datë 20 dhjetor 2024, rreth orës 09:30, në rrugën “Diaspora” në Brekoc – Gjakovë, i pandehuri, pas një mosmarrëveshjeje pronësore të vazhdueshme, ka tentuar me dashje ta privojë nga jeta të dëmtuarin Gj.B. Gjatë një bisede pranë rrethojës së oborrit, pas një fjalosjeje, i pandehuri ka nxjerrë pistoletën dhe ndërsa i dëmtuari po largohej me vrap, ka shtënë nga një distancë rreth 3 metrash, duke e goditur në pjesën e poshtme të shpinës. Si pasojë, i dëmtuari ka pësuar lëndime të rënda dhe të rrezikshme për jetën, për të cilat ka qenë i nevojshëm operimi”, thuhet në njoftim.

Me këto veprime, akuzohej për “Vrasje të mbetur në tentativë” dhe “Mbajtje në pronësi, kontrolle ose posedim të paautorizuar të armëve”.

Kundër këtij aktgjykimi, palët kanë të drejtë ankese në afat prej 30 ditësh nga dita e pranimit të aktgjykimit në formë të shkruar.