Në prag të samitit të NATO-s, presidenti i Ukrainës Volodymyr Zelenskyy, në një intervistë për Sky News, u bëri thirrje aleatëve perëndimorë të forcojnë sanksionet ekonomike ndaj kompanive ndërkombëtare që furnizojnë Rusinë me komponentë për raketa, të cilat po përdoren në sulmet ndaj Ukrainës.

“Komponentët për raketat e tyre dhe raketat janë sulmet më të dhimbshme – po vijnë nga vende të tjera, përfshirë Mbretërinë e Bashkuar, jo shumë, por duke përfshirë Mbretërinë e Bashkuar,” tha Zelenskyy.

“Është… kryesisht Kina, Tajvani, por edhe Evropa, gjithashtu Gjermania, gjithashtu Evropa Lindore”- shtoi ai.

Zelenskyy deklaroi se Ukraina ka identifikuar listat e kompanive të përfshira dhe ia ka dorëzuar ato partnerëve ndërkombëtarë, me kërkesën për vendosjen e sanksioneve të reja.

“Është me rëndësi jetike për ne, dhe po ua dorëzojmë këtë listë partnerëve tanë dhe po u kërkojmë atyre të zbatojnë sanksione. Përndryshe, rusët do të kenë më shumë raketa,” tha Zelensky.

Presidenti ukrainas ngriti alarmin për një kërcënim të mundshëm ndaj vetë aleancës së NATO-s, duke theksuar se rritja e shpenzimeve ushtarake nuk po ecën me ritmin e duhur përballë ambicieve afatgjata të Kremlinit.

“Sipas mendimit tim, kjo është e ngadaltë sepse ne besojmë se duke filluar nga viti 2030, Putini mund të ketë aftësi dukshëm më të mëdha.”

Zelenskyy shtoi se Ukraina aktualisht po përmban përparimin e ushtrisë ruse, por paralajmëroi se nëse agresioni nuk frenohet, mund të përhapet në Evropë.

“Sot, Ukraina po e pengon. Putini nuk ka kohë të stërvitë ushtrinë dhe të gjithë po shkatërrohen dhe shfarosen në fushën e betejës,” tha Zelensky.

Në përfundim, Zelenskyy u shpreh se ekziston rreziku real që Rusia të tentojë një sulm ndaj një vendi anëtar të NATO-s brenda pesë viteve të ardhshme.

Intervista e plotë me presidentin ukrainas pritet të transmetohet më vonë gjatë ditës./euronews