Vuçiç viziton për herë të parë Ukrainën

14:23 | 11 Qershor 2025
E.G

Presidenti i Serbisë, Aleksandar Vuçiç, ndodhet në Ukrainë, në qytetin ukrainas të Odesës, për një samit rajonal, hera e parë që udhëheqësi viziton vendin gjatë qëndrimit të tij në pushtet.

Në një deklaratë, zyra e Vuçiç tha se ai shkon në Ukrainë për të marrë pjesë në Samitin Ukrainë-Evropë Juglindore në portin e Odesës. Politikanë të lartë nga 12 vende të Evropës Juglindore pritet të jenë pjesëmarrës në samit.

Edhe pse Beogradi ka refuzuar t’u bashkohet sanksioneve perëndimore ndaj Rusisë për shkak të pushtimit të Ukrainës, ai ka dënuar politikat e Moskës në Kombet e Bashkuara dhe ka shprehur mbështetje për integritetin territorial të Ukrainës.

Vuçiç është takuar më parë edhe me presidentin ukrainas Volodymyr Zelenskiy të paktën tre herë. Beogradi e njeh Ukrainën në tërësinë e saj, duke përfshirë territoret e marra nga Rusia që nga viti 2014.