Izraeli ktheu trupat e pajetë të 15 palestinezëve në Gaza, të premten, thanë zyrtarët në spitalin Nasser në Khan Younis, në hapin më të fundit drejt përmbushjes së kushteve të marrëveshjes së brishtë të armëpushimit të ndërmjetësuar nga SHBA-ja.

Trupat e pajetë u kthyen pasi militantët e Hamasit në orët e vona të së enjtes dorëzuan trupin e pajetë të njërit prej katër pengjeve izraelite të mbetura, të marrë gjatë sulmit të 7 tetorit 2023, i cili nisi luftën në Gaza.

Që nga fillimi i armëpushimit mes Izraelit dhe Hamasit, më 10 tetor, mbetjet e 25 pengjeve janë kthyer në Izrael. Ende mbeten tre të tjerë në Gaza, që duhet të gjenden dhe të dorëzohen. Hamasi i ktheu 20 pengje të gjalla Izraelit, më 13 tetor.

Për çdo peng të kthyer, Izraeli ka liruar trupat e pajetë të 15 palestinezëve, një shkëmbim kyç i fazës së parë të armëpushimit. Në total, numri i trupave të palestinezëve të pranuar deri tani është 330, prej të cilëve vetëm 95 janë identifikuar zyrtarisht, sipas zyrtarëve të Ministrisë së Shëndetësisë në Gaza.

Gjithashtu të premten, trupat e 27 palestinezëve të paidentifikuar u varrosën në Deir al-Balah. Deri më tani, 182 palestinezë të tjerë të paidentifikuar janë varrosur, sipas Ministrisë së Shëndetësisë së Gazës.