Presidenti amerikan Donald Trump ka deklaruar se presidenti i Kinës ka pranuar të mos i ofrojë Iranit asnjë pajisje ushtarake.

Në një intervistë për Fox News, presidenti amerikan gjithashtu tha se Pekini ka pranuar të porosisë 200 avionë Boeing.

Trump, i cili ndodhet në Kinë për një vizitë shtetërore, më herët tha se ai dhe presidenti kinez Xi Jinping kishin rënë dakord që Ngushtica e Hormuzit “duhet të mbetet e hapur për të mbështetur qarkullimin e lirë të energjisë”.

Kina është një aleat kyç i Iranit dhe blerësi më i madh i naftës së tij. Trump ka bërë përpjekje të pasuksesshme për të bindur Xi-në që të përdorë ndikimin e Pekinit ndaj Teheranit, për të pranuar kushtet e SHBA-së për t’i dhënë fund luftës, ose të paktën për të rihapur Ngushticën e Hormuzit.

Gjithashtu ka pasur shumë spekulime se Pekini ka dërguar armë drejt Teheranit.