Të gjithë personat e infektuar me hantavirus nga anija turistike MV Hondius po evakuohen nga Cabo Verde drejt Holandës me avionë mjekësorë, pas reagimit ndërkombëtar ndaj shpërthimit në bord.

Tre pacientë me dyshime për hantavirus nga anija MV Hondius po transportohen drejt Holandës, ndërsa autoritetet ndërkombëtare po menaxhojnë situatën.

Drejtori i Organizatës Botërore të Shëndetësisë (OBSH), Tedros Adhanom Ghebreyesus, ka bërë të ditur se pacientët janë tashmë në rrugë. “Në këtë fazë, rreziku i përgjithshëm për shëndetin publik mbetet i ulët”, ka shkruar ai në X.

Mes të evakuuarve është edhe mjeku i anijes, njoftoi Ministria e Shëndetësisë e Spanjës. Sipas saj, mjeku, i cili fillimisht ishte planifikuar të dërgohej në Ishujt Kanarie në gjendje të rëndë, tani po transportohet direkt në Holandë pasi gjendja e tij është përmirësuar.

Anija MV Hondius, e nisur nga Argjentina, ndodhet aktualisht në ujërat e Cabo Verde, pasi devijoi itinerarin për shkak të rasteve të konfirmuara me hantavirus gjatë kalimit në Atlantik.

Deri më 6 maj, OBSH ka identifikuar tetë raste nga anija, përfshirë tre vdekje, një pacient në gjendje kritike dhe tre persona me simptoma të lehta.

Sipas OBSH-së, simptomat e para janë shfaqur midis 6 dhe 28 prillit, duke përfshirë temperaturë dhe probleme gastrointestinale, ndërsa në disa raste gjendja është përkeqësuar shpejt deri në pneumoni, vështirësi të rënda në frymëmarrje dhe shok.

Pasagjerët pa simptoma pritet të zbresin të shtunën në Tenerife, ku do të aktivizohet mekanizmi evropian i evakuimit dhe riatdhesimit. Anija do të ankorohet në portin e Granadilla de Abona, nga ku pasagjerët e huaj do të kthehen në vendet e tyre, ndërsa 14 shtetas spanjollë do të transferohen në Madrid.

Të gjithë pasagjerët dhe ekuipazhi do të kontrollohen dhe trajtohen sipas protokolleve të përbashkëta të OBSH-së dhe ECDC-së, duke shmangur kontaktin me popullatën lokale dhe duke garantuar sigurinë e personelit shëndetësor.

Gjurmimi i rasteve të lidhura

OBSH po gjurmon më shumë se 80 pasagjerë pas një rasti me hantavirus në një fluturim drejt Johanesburgut, ku një pasagjere më pas ka ndërruar jetë. Ajo ishte evakuuar më parë nga ishulli St. Helena.

Sipas OBSH-së, gruaja 69-vjeçare kishte udhëtuar më 25 prill me një avion me 82 pasagjerë dhe 6 anëtarë ekuipazhi. Ajo vdiq të nesërmen në spital, ndërsa infeksioni u konfirmua më vonë.

Çfarë është hantavirusi

Hantavirusi është një grup virusesh që bartet nga brejtësit dhe transmetohet te njerëzit kryesisht përmes thithjes së grimcave nga urina, pështyma ose jashtëqitjet e tyre të thata.

Infeksioni mund të shkaktojë sëmundje të rënda të mushkërive ose veshkave, duke filluar me simptoma si temperaturë, dhimbje koke, dhimbje muskujsh dhe probleme gastrointestinale, dhe në raste të rënda duke çuar në vështirësi serioze në frymëmarrje dhe ulje të tensionit të gjakut.

Periudha e inkubacionit zakonisht zgjat nga 1 deri në 8 javë.

Nuk ka trajtim specifik, ndërsa transmetimi nga njeriu te njeriu është shumë i rrallë dhe kërkon kontakt të ngushtë.

Situata në anijen MV Hondius

Tre persona kanë vdekur dhe tetë të tjerë janë sëmurë në bordin e anijes MV Hondius, e cila ndodhet ende e izoluar pranë Cabo Verde me rreth 150 persona në bord.

Anija kishte nisur udhëtimin nga Argjentina më 1 prill, por itinerari është ndryshuar për shkak të shpërthimit të infeksionit.

OBSH ka konfirmuar se tre pacientë janë evakuuar drejt Holandës.

Pasagjerët mbeten të izoluar në kabina, ndërsa autoritetet presin lejimin e ankorimit në Ishujt Kanarie.

Sipas OBSH-së, po hetohet mundësia e transmetimit nga njeriu te njeriu, edhe pse kjo konsiderohet shumë e rrallë, dhe se rasti i parë i infeksionit ka ndodhur para hipjes në anije.

Simptomat dhe rreziku

Simptomat fillestare përfshijnë temperaturë, lodhje, dhimbje muskujsh dhe probleme gastrointestinale. Më vonë mund të zhvillohen probleme serioze në frymëmarrje dhe komplikime të rënda.

Shkalla e vdekshmërisë ndryshon sipas llojit të virusit dhe mund të arrijë deri në 35% në format më të rënda.

Trajtimi

Nuk ka kurë specifike për hantavirusin. Trajtimi është mbështetës, duke përfshirë oksigjen, ventilim mekanik dhe kujdes intensiv në raste të rënda. Trajtimi i hershëm rrit shanset për mbijetesë. / Burimi: Euro News