Sekretari i Mbrojtjes i Shteteve të Bashkuara, Jim Mattis, ka thënë sot se Amerika do të vazhdojë t’iu ofrojë armë luftëtarëve kurdë të Sirisë edhe pasi që të ketë përfunduar beteja për largimin e militantëve të Shtetit Islamik (ISIS) nga Raqqa, Siri.

Duke e përshkruar garancinë amerikane ndaj Turqisë se SHBA-ja do t’ia marrë armët që ia kishte dhënë kurdëve sirianë sapo të përfundojë lufta kundër ISIS-it, Mattis ka thënë se varet se kur dhe ku do të mbahet misioni i radhës, transmeton Express.

Mattis tingëlloi i kujdesshëm kur u pyet nëse do të riktheheshin të gjitha armët, duke thënë: “Do të bëjmë çfarë të mundemi.”

Mattis i bëri këto komente para gazetarëve që po udhëtonin me të për në Gjermani.

Në fund të javës së kaluar, zyrtarët turq thanë se Mattis i kishte siguruar ata përmes një letre se armët e dhëna kurdëve sirianë do t’iu merren atyre dhe se SHBA-ja do t’i ofrojë Turqisë një listë të rregullt të armëve që u jepet luftëtarëve.