Ministria e Jashtme britanike ka fajësuar shtetin rus për vdekjen e liderit opozitar Alexei Navalny, duke deklaruar se ajo ishte rezultat i helmimit me një shigjetë që përmbante toksinë bretkose.

Helmi i bretkosës – i quajtur epibatidinë – thuhet se është përdorur kur Navalny, 47 vjeç, vdiq papritur më 16 shkurt 2024.

Yulia Navalnaya, e veja e tij, e bëri të ditur këtë përfundim gjatë një konference për shtyp në Konferencën e Sigurisë në Munih. Ajo ishte e shoqëruar nga ministrat e jashtëm të Mbretërisë së Bashkuar, Gjermanisë, Suedisë dhe Holandës. Navalnaya kishte njoftuar për vdekjen e bashkëshortit të saj në të njëjtën konferencë në vitin 2024.

Navalny mbahej në një burg rreth 64 km në veri të Rrethit të Arktikut kur vdiq. Ai ishte dënuar me dekada burgim, raportoi Guardian.

Aleatët e Navalnyt e kanë akuzuar vazhdimisht Kremlinin për vrasjen e tij – akuza që Moska i ka hedhur poshtë si absurde. Zyrtarët rusë këmbëngulin se ai vdiq si pasojë e një kombinimi sëmundjesh, përfshirë aritmi kardiake të shkaktuar nga hipertensioni.

Gjurmë të epibatidinës u zbuluan pas analizimit të mostrave materiale të marra nga trupi i Navalnyt.

Qeveria britanike tha se helmi gjendet natyrshëm te bretkosat helmuese në Amerikën e Jugut, por se kur këto bretkosa mbahen në izolim nuk e prodhojnë këtë substancë, e cila gjithashtu nuk gjendet natyrshëm në Rusi.

Mbretëria e Bashkuar e ka raportuar helmimin në Organizatën për Ndalimin e Armëve Kimike (OPCË), duke pretenduar një “shkelje flagrante” të Konventës për Armët Kimike nga Rusia.

Kremlini ka një histori të gjatë të përdorimit të helmit si armë kundër kundërshtarëve të tij. Vdekja e Alexander Litvinenkos në Londër nga polonium radioaktiv në vitin 2006, sulmi me agjent nervor ndaj ish-spiunit Sergei Skripal në Salisbury në vitin 2018, si dhe një përpjekje e mëparshme për helmimin e Navalnyt, e kanë forcuar reputacionin e Rusisë për përdorimin e toksinave për të heshtur kritikët.