Rusia dhe Kina i kanë bërë thirrje Koresë Veriore që t’i ndalë programet e veta bërthamore dhe raketore, pak kohë pasi kjo e fundit pohoi se e ka testuar me sukses raketën e parë balistike interkontinentale.

Të dy vendet po ashtu kanë bërë thirrje në të njëjtën kohë që SHBA-ja dhe Koreja Jugore t’i suspendojnë ushtrimet e shkallës së lartë ushtarake, transmeton Express.

Koreja Veriore ka thënë se raketa e saj mund të godasë kudo në botë.

Derisa Veriu duket se ka bërë përparim, ekspertët besojnë se raketa e saj nuk mund ta godasë saktë cakun.

Përkundër pohimit të Koresë Veriore, edhe SHBA-ja edhe Rusia kanë thënë se raketa e saj nuk ka përbërë asnjë kërcënim ndaj vendeve të tyre përkatëse.

Duke e quajtur të papranueshëm shkrepjen e raketës, Rusia dhe Kina po ashtu i kanë bërë thirrje SHBA-së që të mos e vendosë sistemin anti-raketor “Thaad”, i cili për qëllim ka interceptimin e sulmeve nga Koreja Veriore.

Presidenti i Kinës, Xi Jinping ka qenë sot në Moskë, ku u takua për bisedime me presidentin rus, Vladimir Putin.