Sekretari i Shtetit i Shteteve të Bashkuara, Marco Rubio, ka zhvilluar një bisedë telefonike me Sekretarin e Përgjithshëm të Kombeve të Bashkuara, Antonio Guterres, për të trajtuar tensionet në rritje në Ngushticën e Hormuzit, një prej arterieve më strategjike të transportit të naftës në botë.

Sipas një deklarate zyrtare të Departamentit Amerikan të Shtetit, biseda u fokusua kryesisht në përpjekjet e Uashingtonit për të parandaluar Iranin që të vendosë mina detare dhe të imponojë taksa të njëanshme në ngushticë, veprime që do të kërcënonin lirinë e navigacionit ndërkombëtar dhe do të shkaktonin pasoja serioze ekonomike globale.

“Gjatë bisedës, palët diskutuan përpjekjet e SHBA-së për të ndaluar Iranin nga vendosja e minave dhe imponimi i taksave në Ngushticën e Hormuzit, duke përfshirë edhe iniciativën për një rezolutë të re në Këshillin e Sigurimit të Kombeve të Bashkuara”, thuhet në deklaratën e Departamentit të Shtetit.

Zëdhënësi i Departamentit të Shtetit, Tommy Pigott, theksoi se Sekretari Rubio ka shprehur kënaqësinë për mbështetjen e gjerë ndërkombëtare që kanë gjetur përpjekjet amerikane:“Sekretari Rubio theksoi mbështetjen dërrmuese të një baze të gjerë anëtarësh të Kombeve të Bashkuara për këto përpjekje. SHBA-të janë të vendosura të ruajnë lirinë e navigacionit në këtë zonë kritike për ekonominë globale.”

Ngushtica e Hormuzit është porta kryesore përmes së cilës kalon rreth 20-30% e naftës së botës. Çdo pengesë ose mbyllje e saj do të shkaktonte rritje dramatike të çmimeve të energjisë dhe do të destabilizonte tregjet globale.

Tensionet janë rritur ndjeshëm vitet e fundit për shkak të përplasjeve midis Iranit dhe vendeve perëndimore, sidomos pas sulmeve të ndryshme ndaj anijeve tregtare dhe kërcënimeve iraniane për të mbyllur ngushticën në rast të përshkallëzimit të konfliktit.

/rtsh.al/