Donald Trump është bërë presidenti i parë amerikan në detyrë që viziton Murin Perëndimor, një nga vendet më të shenjta të Judaizmit.

Udhëtimi i parë jashtë vendit për Trumpin ishte Arabia Saudite, ndërsa do të vizitojë edhe Vatikanin, Brukselin dhe Samitin e G7 në Sicili, transmeton portali arbresh.info.

Trump arriti në Tel Aviv në mëngjes, dhe u prit si një “mik i mirë” nga kryeministri izraelit Benjamin Netanyahu. Më vonë gjatë ditës, në Jerusalem, ai vendosi dorën e tij mbi Murin Perëndimor dhe u lut në atë vend, në një ngjarje historike kur është fjala për presidentët e SHBA-ve.

Presidentët George H.W. Bush, Bill Clinton, George W. Bush dhe Barack Obama kanë vizituar të gjithë vendin e shenjtë, por në cilësinë e qytetarëve privatë ose kandidatë për zyrën më të lartë në SHBA. Trump është presidenti i parë që e bën këtë ndërsa është në detyrë./Arbresh.info