Izraeli ka liruar një palestinez që ishte arrestuar në mënyrë të diskutueshme në moshën 13-vjeçare, pasi kaloi gati një dekadë në burg.

Ahmad Manasra është ribashkuar me familjen e tij, ka thënë avokati i tij Khaled Zabarqa për CNN.

“Ahmad e ka përfunduar dënimin 10-vjeçar dhe tani është një person i lirë,” tha Zabarqa. “Autoritetet izraelite kanë vendosur kufizime për familjen për sa i përket organizimit të një ceremonie mirëseardhjeje për Ahmadin apo për të folur me mediat.”

Ahmad Manasra u arrestua dhe u burgos në vitin 2015 pasi u kap bashkë me kushëririn e tij Hassan, i cili goditi me thikë dy izraelitë në Jerusalemin Lindor.

Hassani u qëllua për vdekje në vendngjarje, ndërsa Manasra u përplas nga një makinë.

Rasti i Manasrës tërhoqi vëmendje ndërkombëtare pasi doli një video ku turma bërtiste dhe e shante ndërsa ai qëndronte i palëvizshëm, i plagosur rëndë dhe duke klithur. Pamje të tjera thuhet se tregojnë zyrtarë izraelitë duke e marrë në pyetje Manasrën nën presion, ndërsa ai është dukshëm i tronditur dhe i pambrojtur, sipas Shoqatës së të Burgosurve Palestinezë./Zëri