Guterres: Lartësirat e Golanit, territor i Sirisë

08:58 | 4 Prill 2019
Arbresh.info

Sekretari i Përgjithshëm i Kombeve të Bashkuara (OKB), Antonio Guterres, tha se Lartësirat e pushtuara të Golanit janë territor i Sirisë, raporton Anadolu Agency (AA).

Duke folur në një konferencë të përbashkët për shtyp në Kajro me ministrin e Jashtëm të Egjiptit Smih Shukri, Guterres riafirmoi këmbënguljen e OKB-së për sovranitetin sirian mbi rajonin e pushtuar.

Lidhur me çështjen palestineze, Guterres tha se mbështesin zgjidhje me dy shtete me kryeqytet Kudsi dhe shtoi se OKB përpiqet të gjejë një zgjidhje e cila do të garantonte zbatimin e të gjitha rezolutave të organizatës.

Gjatë qëndrimit të tij në Egjipt, shefi i OKB-së është takuar edhe me presidentin Abdulfettah al-Sisi, me të cilin kanë diskutuar krizën në Jemen dhe Siri.

Më herët, Guterres, i cili mbërriti në Egjipt gjatë ditës së djeshme, është takuar edhe me shejhun e Al-Azharit Ahmed al-Tajjib.

Pas vizitës në Egjipt, Guterres pritet të udhëtojë për në Libi.

Ndryshe, SHBA së fundmi ka njohur sovranitetin izraelit mbi Lartësirat e Golanit, rajon sirian të cilin Izraeli e pushtoi në vitin 1967.

Shpërndaje në rrjete sociale