Ministrja e Arsimit, Arbërie Nagavci, ka njoftuar se deri tani numri i aplikuesve për subvencionim për tekste shkollore në Platformën e-Kosova ka arritur në 121,200.

Nagavci ka shtuar se nga java e ardhshme do të fillojë procesi i transferimit të mjeteve për aplikantët.

“Sikurse kemi njoftuar edhe më herët, aplikimi do të jetë i hapur në mënyrë që të sigurohemi që asnjë nxënës për çfarëdo arsye të mos mbetet pa tekste shkollore. Ju sigurojmë se çdo rast i adresuar do të trajtohet me prioritet dhe do të ofrohet ndihma e nevojshme për aplikim dhe përfitim të këtyre mjeteve”, tha Nagavci.

Ministrja e Arsimit, Shkencës, Teknologjisë dhe Inovacionit ka vendosur që subvencionimi për blerjen e teksteve shkollore dhe mjeteve shkollore do të vazhdojë edhe këtë vit, në përputhje me vitin e kaluar. Megjithatë, për momentin nuk janë të qarta çmimet e librave dhe as kostoja totale që do t’i kushtojë ministrisë për këtë subvencionim./Arbresh.info/