Ministria e Arsimit, Shkencës, Teknologjisë dhe Inovacionit përmes një komunikate për media, njofton se përkundër se janë bërë të gjitha përgatitjet për fillimin e vitit të ri shkollor, nga informatat jo të plota, kryesisht komunikim i zyrtarëve të MASHT me zyrtarë komunal, janë informuar që shumica e shkollave në Kosovë nuk kanë mbajtur mësim për shkak të grevës së shpallur nga BSPK.

Sipas të dhënave të Ministrisë, situata dallon nga shkolla në shkollë, ku në disa ka nisur procesi mësimor e në disa të tjera mësimi është mbajtur pjesërisht.

“Ministria e Arsimit, Shkencës, Teknologjisë dhe Inovacionit edhe njëherë ju bënë thirrje drejtorive komunale të arsimit që t’i përgjigjen obligimit dhe të mbajnë komunikime në vijë institucionale rreth vijueshmërisë së procesit mësimor në shkolla. Dyert e shkollave nuk duhet të mbyllen. Humbja e mësimit është cenim i të drejtës themelore të fëmijëve për arsimim”, thuhet në komunikatën e Ministrisë së Arsimit./arbresh.info/