Ministri i Financave, Bedri Hamza ka pritur sot në takim njohës ambasadorin e ri të Shteteve të Bashkuara të Amerikës në Kosovë Philip Kosnett, ku diskutuan për bashkëpunimin e Kosovës dhe Shteteve të Bashkuara të Amerikës në fushën e ekonomisë dhe financave, bëhet e ditur përmes një komunikate për media.

Hamza duke e uruar për detyrën e re Ambasadorin Kosnett, e falënderoi atë për ndihmën dhe kontributin që Shtetet e Bashkuara të Amerikës kanë dhënë dhe po japin për institucionet e Kosovës, veçanërisht për Ministrinë e Financave në avancimin e financave publike të shtetit të Kosovës.

Gjatë këtij takimi Hamza gjithashtu e njoftoi ambasadorin Kosnett për procesin e Buxhetit të Kosovës për vitin 2019, si dhe për planet dhe objektivat e Ministrisë së Financave për vitin 2019, me theks të veçantë në menaxhimin e financave publike si dhe ruajtjen e stabilitetit makrofiskal të vendit.

Ndërsa, ambasadori i ri i SHBA-së në Kosovë Philip Kosnett, shprehi gatishmërinë e tij dhe të shtetit amerikan për vazhdimin e bashkëpunimit me institucionet e Republikës së Kosovës, veçanërisht me Ministrinë e Financave.