Fituan bursën, por më pas u larguan pa asnjë paralajmërim nga lista e përfituesve në Fakultetin Filozofik.

Anita Avdyli, studente e vitit të dytë në Fakultetin Filozofik, thotë se i plotësoi të gjitha kushtet për të fituar bursën, raporton KTV. Mirëpo, pasi dolën listat, emri i saj u tërhoq nga lista.

Për më tepër, kur ajo kërkoi sqarime nga Rektorati dhe kërkoi vendimin se përse u eliminua nga lista e përfituesve, zyrtarët e Rektoratit i thanë se nuk është nxjerrë ende vendimi.

Njëjtë si Anita, nga lista u largua, pa asnjë sqarim, edhe kolegu i saj, Florian Qerimi, i cili kishte përfituar bursën në mesin e 90 përfituesve tjerë.

Mirëpo, zyrtarët e Rektoratit thonë se Anita dhe Floriani u larguan nga përfituesit e bursës për shkak se nuk i plotësuan kushtet për ta fituar atë.

Megjithatë, ata pranojnë se gabuan dhe se vendimi për largim iu dha me vonesë studentëve, përcjell Koha.net. Sipas Pajazitit, ata kanë pranuar edhe ankesat e rreth 22 studentëve të Fakultetit Ekonomik, të cilët njëjtë kishin aplikuar për bursë, por që u ishte refuzuar ajo.