Përfaqësues të Këshillit për Mbrojtjen e të Drejtave dhe Lirive të njeriut u takuan sot me drejtorin e ri të Shërbimit Korrektues të Kosovës, Nehat Thaçi me të cilin biseduan për çështjet e përgjithshme të Shërbimit korrektues.

KMDLNj, në cilësinë e organizatës e cila me vite të tëra monitoron realizimin e të drejtave të personave të privuar nga liria dhe të stafit korrektues dhe prezantoi një pasqyrë të përgjithshme të Shërbimit Korrektues në përgjithësi dhe i paraqiti sfidat dhe çështjet të cilat kërkojnë të realizohen më shpejt dhe që kërkojnë vëmendje më të shtuar.

Në takim u pajtua se gjendja e përgjithshme në Shërbimin Korrektues të Kosovës është e mirë, por u cekën edhe drejtimet ku ka ngecje dhe që duhet të punohet më me përkushtim.

Në njoftimin e KMDLNj-së thuhet se Thaçi mirëpriti të gjitha çështjet e ngritura nga KMDLNj dhe kërkoi që organizatat e shoqërisë civile të cilat merren me monitorimin e të drejtave të njeriut për personat e privuar nga liria të paraqesin rekomandimet dhe të jenë bashkëpunëtorë në përmirësimin e gjendjes dhe të kushteve për personat e privuar nga liria dhe stafin e angazhuar në këtë shërbim.

“Për KMDLNj paraqet shqetësim numri i madh i atyre që një kohë të gjatë janë ushtrues detyre, infrastruktura rreth qendrës së paraburgimit në Gjilan, vonesa e funksionalizimit të qendrës së paraburgimit në Prishtinë e që për pasojë shkakton mbipopullimin në Qendrën e paraburgimit në Lipjan, mos-sistemimi i të miturve me masë edukative në Qendrën e të mitruve në Lipjan sikur edhe mos –sigurimi i ushqimit për personat e privuar nga liria në përputhje me nevojat shëndetësore, në mes të tjerash”, thuhet në njoftim.

KMDLNj i pohoi drejtorit se do të jenë bashkëpunëtorë në të gjitha çështjet të cilat do të jenë në të mirë dhe që ndikojnë në përmirësimin e trajtimit dhe kushteve për personat e privuar nga liria dhe të stafit korrektues.