Mino Raiola, super agjenti i cili i ka nën menaxhim yjet si Paul Pogba, Zlatan Ibrahimovic dhe Romelu Lukaku, e ka sulmuar ashpër trajnerin e Manchester Cityt, Pep Guardiolan.

Raiola e ka quajtur “qen dhe frikacak” trajnerin spanjoll, i cili refuzoi të përmbahej kur diskutoi për Guardiolan duke e bërë publike mosmarrëveshjen e gjatë mes dyshes.

Armiqësia mes tyre u krijua në vitin 2011 kur klienti i Raiolas, Ibrahimovic, u detyrua të largohej nga Barcelona pas mosmarrëveshjeve që kishte me Guardiolan, gjë që përfundimisht i kushtoi atij me humbjen e një medaljeje në Ligën e Kampionëve, e cila ende i mungon në karrierë e tij të bujshme.

Dhe marrëdhëniet mes Raiolas dhe Guardiolas janë aq të këqija saqë super agjenti insiston se më parë do t’i dërgonte lojtarët e tij në klube tjera se ta shihte spanjollin duke përfituar nga shërbimet e tyre.

“Pep Guardiola, trajneri, është fantastik. Si person, ai është absolutisht zero. Ai është frikacak; është qen”, ka thënë Raiola.

“Ai është prift klasik. ‘Bëj si të them unë – mos bëj çfarë bëj unë…’ Nëse Manchester City e fiton Ligën e Kampionëve këtë sezon, do të dëshmohet se çfarë trajneri i mirë është ai – por do ta urreja nëse e fiton ai”, shtoi agjenti.