Forcat e Armatosura përkujtuan 105-vjetorin e krijimit të tyre. Ceremonia duhet të ishte zhvilluar të hënën, por për shkak të angazhimit masiv të ushtrisë në zonat e përmbytura, ceremonia u shty për të martën.

“Në këtë përvjetor historik ne kujtojmë me respektin më të madh të gjithë patriotët që kontribuan me krijimin dhe fuqizimin e ushtrisë shqiptare”, tha kreu i shtetit, Ilir Meta.
Ministrja Olta Xhaçka vlerësoi rolin e trupave shqiptare brenda dhe jashtë vendit.

“Pjesë e strukturave të NATO-s, forcat tona të armatosura japin kontributin e tyre në luftën kundër terrorizmit, por edhe në vendosjen e paqes kudo që u kërkohet në tokë, në det dhe në ajër”, u shpreh ministrja e Mbrojtjes, shkruan top channel.
Gjatë ceremonisë baza ajrore e drejtuar nga Kolonel Kuto Hasani, u vlerësua me medalje për përmbushjen e misioneve.

Një ditë më parë, Kryeministri Edi Rama uroi përmes një postimi në rrjetet sociale “ditëlindjen” e FA.

“Në këtë ditë, që shënon edhe 105-vjetorin e themelimit të Forcave të Armatosura të Shqipërisë, u urojmë me mirënjohje për gjithçka kanë bërë, gjithnjë dhe edhe në këto ditë e netë sprove të madhe, vajzave e djemve, grave e burrave, të cilët i kanë dhënë lavdi e nder misionit atdhetar të ushtrisë sonë”, shkruan ai./Top Channel