Ministria e Administratës Publike ka hapur konkursin për Drejtor të Institutit të Mjekësisë Ligjore. Konkursi është hapur më 3 nëntor dhe do të jetë i hapur deri më 15 nëntor, kurse  paga bruto për këtë pozitë është mbi 1000 euro.

Pjesë e këtij konkursi do të jetë edhe drejtori i tanishëm i Institutit të Mjekësisë Ligjore, Arsim Gërxhaliu, i cili për portalin “Arbresh.info” konfirmoi pjesëmarrjen e tij.

Gërxhaliu thotë se ende nuk ka konkurruar, por që këtë do ta bëj brenda afatit kohor, dhe se është i interesuar që punët që kanë mbetur në gjysmë në këtë Institut t’i përfundojë vetë.

Ai thotë se të gjitha ndërrimet e ish-Institutit i ka bërë vetë, për ta sjellë këtë Institut deri në këtë nivel të agjensionit, duke e shkëputur nga Ministria e Shëndetësisë.

 “Qe dy vite është bërë agjensioni si Institut i Mjekësisë Ligjore dhe jam vet arkitekt i kësaj, ka edhe pak punë për ta kompletuar, sepse duhet të certifikohen sektorët, andaj nuk kisha pasur dëshirë që këto të  mbesin në gjysmë”, u shpreh Gërxhaliu, duke bërë me dije se do të konkurrojë për këtë pozitë .

Gërxhaliu, përmend krijimin e sektorëve të ndryshëm brenda këtij Instituti, duke përfshirë, Zyrën për Persona të Zhdukur dhe Mjekësi ligjore në 2002 dhe Departamentin  për Mjekësi Ligjore nën Ministrinë e Drejtësisë në 2008.

Ndërkohë, “Arbresh.info” mëson se për këtë pozitë do të konkurrojnë edhe mjekët ligjorë Musa Gashi dhe Naim Uka.

Konkursi për këtë pozitë është i hapur, dhe të drejtë konkurrimi kanë të gjithë nëpunësit civil në pozita të larta drejtuese, pozita drejtuese ose në pozita të barasvlershme në institucionet e administratës publike apo në kompanitë publike ose private.

Mandati i kësaj pozite do të jetë për tri vitet e ardhshme./Arbresh.info/Gita Lushi