Drejtori i projektit “Atomi”, Jusuf Thaçi, përmes një postimi publik në Facebook ka kërkuar dorëheqjen e deputetit të Vetëvendosjes, Frashër Krasniqi. Thaçi konsideron se Krasniqi duhet të dorëhiqet nga pozita aktuale e tij pasi e grushtoi Milaim Zekën “live” në emision. Këtë veprim ai e ka konsideruar si të papranueshëm.

“Duke qenë deputet i kuvendit dhe përfaqësues i një subjekti politik, pavarësisht se reagimi dhe veprimi yt ka qenë tërësisht individual, personal, emocional, ndoshta dhe instinktiv, sërish ai veprim i yti interpretohet si veprim politik i yti dhe i subjektit politik që ti përfaqëson, gjë që nuk është e vërtetë”, shkruan Thaçi.

“Nuk e di ç’të kanë thënë të tjerët për këtë veprim tëndin, por unë e gjykoj atë si veprim të papranueshëm për një deputet dhe veç kësaj jam shumë i bindur që ai veprim e ka dëmtuar dhe do ta dëmtojë edhe në të ardhmen personalitetin tënd dhe Lëvizjen Vetëvendosje. Prandaj, gjykoj që duhet të distancohesh në mënyrë eksplicite nga ai veprim i yti, duke kërkuar falje për sjelljen tënde dhe duke dhënë dorëheqje nga pozita e deputetit. Vetëm kështu do të mund të ndërpritej dëmi për ty dhe për Lëvizjen Vetëvendosje”, ka shkruar Thaçi.