Zëvëndëskryeministri i parë dhe Ministri i Punëve të Jashtme, z.Behgjet Pacolli, ka kërkuar përfshirjen e SHBA-vë në dialogun Kosovë-Serbi.

Përmes një postimi në llogarinë zyrtare në Facebook, z.Pacolli ka theksuar se përfshirja e SHBA-ve në dialog duhet të jetë e domosdoshme për shkak të “rolit që ka luajtur Amerika në përfundimin e luftërave në ish-Jugosllavi”, transmeton portali arbresh.info

Ai ka theksuar se marrëveshja përfundimtare Kosovë-Serbi pa ndihmën e Amerikës do të jetë shumë e vështirë.

Postimi i plotë i z.Behgjet Pacolli

Përfshirja e SHBA në dialogun Kosovë-Serbi, e domosdoshme

Duke marrë parasysh rolin vendimtar të Shteteve të Bashkuara të Amerikës në përfundimin e luftërave të përgjakshme në ish-Jugosllavi, ndërtimin e paqes dhe garantimin e stabilitetit në Evropën Juglindore, respektivisht Ballkanin Perëndimor është pothuajse e paimagjinueshme dhe shumë e vêshtirë të ketë një Marrëveshje përfundimtare/historike Kosovë-Serbi pa përfshirjen direkte të ShBA-ve. 
Andaj, përfshirja direkte e SHBA-së bashkë me BE-në, në fazën përfundimtare është e domosdoshme, në mënyrë që të sigurohet një Marrëveshje përfundimtare e pranueshme dhe e zbatueshme për të dy palët.