Ish- Kryeministri i Kosovës, njëherësh kryetar i LDK-së, Isa Mustafa, ia ka kujtuar Lëvizjes Vetëvendosje se si në vitin 2013 ata arritën ta fitojnë udhëheqjen e Prishtinës. Thotë se po të mos ishte PDK-ja, sot Vetëvendosjen do ta mbulonte pluhuri në ndonjë sirtar të lëvizjeve politike.

“Lëvizja Vetëvendosje nuk e fitoi Prishtinën në vitin 2013. Ia fitoi PDK-ja. Ishin këto dy parti dhe patericat e PDK-së, që i kapi tmerri i fitores së LDK-së në shumë komuna në vitin 2013, krijuan koalicion të fshehur u mobilizuan dhe arritën të përmbysin diferencën prej rreth 9000 votave, që unë si kandidat për të parin e Prishtinës kisha para Shpend Ahmetit dhe para të gjithë kandidatëve tjerë. Po të mos ishte përkrahja dhe koalicioni PDK-VV, sot Vetëvendosjen do ta mbulonte pluhuri në ndonjë sirtar të lëvizjeve politike”, ka shkruar Mustafa në Facebook.

Ai madje sqaron se Kadri Veseli e pranoi në një intervistë se ai kishte bashkëpunuar ngushtë me Shpend Ahmetin për një vit pas zgjedhjeve lokale.

Kjo, siç thekson ai, përputhet me përgatitjen e 70 dosjeve “…sepse kur bashkohet VV që ua ngjet mikrofonat dhe kamerat e fshehta aktivistëve të tyre për të inskenuar afera dhe shefi i SHIK-ut, s’pritet zhvillim as prosperitet veç dosje dhe akuza”, ka përfunduar ai.