Numri i myslimanëve Rohinghya që po  iknin nga dhuna në Mianmar  ka shkuar përtej 120 mijë, raporton OKB.

Mijëra të tjerë janë duke u përpjekur që të kalojnë kufirin për në Bangladesh, transmeton portali arbresh.info

Imazhet e marra në kufi tregojnë gra dhe fëmijë që notojnë përgjatë lumit Naf, që ndan të dy vendet. Prindërit kalojnë lumin me fëmijët e tyre mbi shpatulla, ndërsa të tjetër mundohen që të bartin gjërat e pakëta që kanë arritur të shpëtojnë nga shtëpitë e tyre.

Megjithatë, sapo të mbërrijnë në një nga kampet e refugjatëve në Bangladesh, ata mund të përballen me kthim.

Agjencia e Kombeve të Bashkuara për Refugjatët (UNHCR) ka paralajmëruar se kampet e ngritura janë përtej kapacitetit, pasi numri i personave të zhvendosur ka arritur deri në 123 mijë.

“Numrat janë shumë shqetësues. Ata po rriten shumë shpejt, “tha zëdhënësja e UNHCR-së, Vivian Tan.

Agjencia ka kërkuar ndihmë për të ngritur kampe të reja, pasi sipas tyre shumica e të larguarve janë të traumatizuar, të uritur dhe kanë nevojë për ndihmë mjeksore.

Myslimanët në Mianmar kanë hasur në një diskrimin të gjatë nga vendi budist në Azinë Juglindore. Dhuna e fundit shpërtheu me 25 gusht, kur militantët Rohingya sulmuan postet e largëta të policisë, duke vrarë 15 zyrtarë.

Rohingya janë një minoritet etnik mysliman pa nënshtetësi që në Mianamar janë përballur me persekutimin e ushtrisë që ka djegur fshatrat e tyre dhe ka vrarë civilë. Sigurisht që Mianmari mohon çdo lloj persekutimi, ndërsa vetë liderja “de facto” e vendit Suu Kii në një intervistë për BBC në mars konfirmoi të njëjtën gjë./arbresh.info/

Foto: AP/Daily Mail