Liderët e tri partive opozitare janë mbledhur në ora 20:00. Ramush Haradinaj, Visar Ymeri dhe Fatmir Limaj janë duke diskutuar në Kuvendin e Kosovës për veprimet që do ti marrin të premten, kur edhe pritet të votohet Gjykata Speciale.

Takimin e liderëve e ka konfirmuar edhe Bilall Sherifi nga NISMA. Ai nuk ka dhënë shumë detaje, vetëm ka thënë se takimi është duke u zhvilluar edhe se tema e diskutimit është Gjykata Speciale.

“Po. Takimi është duke u mbajtur. Ka të bëjë më dakordimin e veprimeve që do ti marrë opozita ditën e premte. Në këtë takim janë të pranishëm liderët e partive dhe shefat e grupeve parlamentare”, ka thënë Sherifi.

Opozita në vazhdimësi po e kundërshton themelimin e kësaj Gjykate. Mirëpo, përpos opozitës edhe disa deputetë të PDK-së kanë qenë kundër themelimit të kësaj Gjykate. Madje, para një muaji kur ishte sjellë për votim në kuvend ky projektligj, hiq më pak se 11 deputetë të PDK-së paralajmëruan votën kundër, duke bërë që të shtyhet seanca, me arsyetimin se nuk i kanë të gatshme amendamentet e sjella nga Brukseli.