Kryetari i Gjykatës Themelore të Ferizajt, Bashkim Hyseni, sot ishte nikoqir i krerëve më të lartë të gjyqësorit në Kosovë.

Hyseni të premten ka pritur kryetarin e Gjykatës Supreme Fejzullah Hasani, kryetarin e Gjykatës së Apelit, Sali Mekaj, si dhe gjashtë kryetarët e Gjykatave Themelore të Kosovës.

“Gjatë këtij takimi të nivelit më të lartë të sistemit të drejtësisë, janë diskutuar arritjet dhe sfidat me të cilat përballet gjyqësori i Kosovës. Temë diskutimi po ashtu ka qenë raporti i punës së gjykatave, politikat ndëshkimore, paraburgimi me rastet e kryerësve me çrregullime mendore, asgjësimi i lëndëve të vjetra etj”, thuhet në një komunikatë për media nga Gjykata Themelore e Ferizajt, shkruan kp.

Kryetarë e të gjitha gjykatave në këtë takim kanë shprehur gatishmërinë e tyre për vazhdimin e bashkëpunimit të gjykatave në nivel të vendit.

Në takim kanë marr pjesë edhe kryetari i Gjykatës Themelore të Gjilanit Zyhdi Haziri, kryetari i Gjykatës Themelore në Pejë, Elmaze Syka, kryetari i Gjykatës Themelore në Gjakovë, Vaton Durguti dhe kryetari i Gjykatës Themelore të Prizrenit, Ymer Hoxha.