Gjykata e Apelit ka refuzuar si të pabazuar ankesën e kryetarit të Kllokotit, Sreçko Spasiq kundër aktgjykimit të Gjykatës Themelore në Gjilan.

Sipas njoftimit të kësaj gjykate kolegji penal ka refuzuar si të pa bazuara  ankesat  e prokurorisë dhe avokatit mbrojtës  kundër aktgjykimit PKR.nr.186/15,të  nxjerrë nga ana e Gjykatës Themelore- DKR në Gjilan, me 14.11.2016, transmeton Arbresh.info

“Apeli gjeti se gjykata e shkallës së parë ka vërtetuar drejtë gjendjen faktike, nuk ka bërë shkeljeje të dispozitave të procedurës penale si dhe ka aplikuar drejtë ligjin penal. Po ashtu, kjo gjykatë vlerëson se nuk qëndrojnë as pretendimet e mbrojtësit për dënim më të butë   ngase gjykata e shkallës së parë drejtë ka vlerësuar rrethanat  e kryerjes se veprës penale si dhe ka marrë parasysh rregullat e përgjithshme për matje te dënimit”, thuhet në njoftimin e kësaj gjykate.

Ndërkohë, i akuzuari Sreçko Spasiq është shpallur fajtor, pasi që në cilësinë e kryetarit të Komunës së Kllokotit, ka tejkaluar autorizimet e tij në atë mënyrë që, me datë 3 shkurt 2014, ka nxjerrë aktvendimin me numër protokolli 4134/1, me të cilin pa ndonjë arsye ligjore e ka larguar të dëmtuarin  T.S. nga vendi i punës, përkatësisht nga pozita e drejtorit të Shkollës Fillore “Marko Rajkoviq” në fshatin Vërbovc, e i cili ka pasur mandat deri më 2 Dhjetor 2015”, thuhet në njoftimin e Apelit.

Po të njëjtën datë me 3 Shkurt 2014  Spasiq ka nxjerrë edhe aktvendimin me numër protokolli 4133/1, të cilin pa ndonjë arsye ligjore e ka larguar dëmtuarin B.D. nga vendi i punës, përkatësisht nga pozita e drejtorit të Shkollës Ekonomike – Teknike në fshatin Vërbovc, e i cili ka pasur mandat deri më 2 Dhjetor 2015, duke kryer kështu  veprën penale “Keqpërdorimi i pozitës apo autoritetit zyrtar”, nga neni 422 paragrafi 1 i Kodit Penal të Republikës së Kosovës. /Arbresh.info/