Presidentja e Kosovës, Atifete Jahjaga ishte ftuar zyrtarisht që të merrte pjesë në Samitin Botëror të Gruas, i cili fillon punimet sot në Sao Paolo të Brazilit.

Por, e para e vendit, ka refuzuar që të udhëtojë për në Brazil, shtet ky që akoma nuk e ka njohur pavarësinë e Kosovës.

Këshilltari për media i presidentes Jahjaga, Arbër Vllahiu, tha se shteti i Brazilit i ka ofruar vizë Jahjagës dhe ekipit të saj, por se e para e vendit, nuk ka pranuar kriteret e parashtruara nga shteti amerikanojugor.

“Presidentja e Republikës së Kosovës është ftuar zyrtarisht për të marrë pjesë në Samitin Botëror të Gruas, në Jubileun e 25-të të tij, që fillon punimet në Sao Paolo të Brazilit nga dita e sotme. Sipas procedurave është dashur të kërkohet vizë hyrëse për shtetin e Brazilit dhe e njëjta gjë ka ndodhur. Për Presidenten dhe ekipin e saj, autoritetet e Brazilit kanë ofruar dhënien e vizave sipas kritereve dhe kushteve të parapara me regjimin e vizave të këtij shteti, që ende nuk e ka njohur pavarësinë e Kosovës, por të njëjtat kanë qenë të papranueshme për Presidenten. Presidentja Jahjaga përfaqëson dhe prezanton shtetin e Kosovës në çdo vizitë jashtë vendit, pavarësisht se bëhet fjalë për Samit, konferencë, takim multilateral apo bilateral”, tha Vllahiu.