Eksperti: Eksplozivi i Gavriqit, i njëjtë me atë të sulmit në Francë dhe Bruksel

08:15 | 7 Prill 2016
M. A.

Njëzet e pesë pakot me eksploziv, të gjetura para dy vjetësh në Prishtinë në veturë të shtetasit të Serbisë, Slobodan Gavriq, e kanë të njëjtën përbërje dhe fuqi sikurse eksplozivët e përdorur gjatë sulmeve të fundit terroriste në Francë dhe Bruksel.

Këtë konstatim e ka dhënë eksperti policor, Muhamet Rushiti, të mërkurën, në gjykimin kundër Gavriçit, i cili po akuzohet për përgatitje të veprave penale të terrorizmit, shkruan sot Koha Ditore.

Rushiti që është edhe shef i Njësisë për trajtimin e mjeteve të improvizuara eksplozive në Policinë e Kosovës, ka treguar detajet e zbulimit të këtij eksplozivi, si dhe për dëmet që do të mund t`i shkaktonte nëse do të aktivizohej. Për këtë rast, ka thënë se është bërë një ekspertizë.

Ky mjet, sipas ekspertizës, e cila i është bërë nga FBI-ja e SHBA-së ka rezultuar se është eksploziv i llojit PETN (penta eritritol tritranitrate), si lloji më i fortë dhe më i fuqishmi. Eksplozivi, sipas ekspertit, po mbahet në depon për mjete të rrezikshme në polici.