Vjen një tjetër lajm i mirë për Kosovën.

Është Atletika sporti i radhës që zyrtarisht është pranuar sot në Federatën Ndërkombëtare të Atletikës.

Bordi Ekzekutiv i Federatës Botërore të Atletikës, në mbledhjen e mbajtur në Pekin, ka vendosur që me drejta të plota të pranojnë në gjirin e saj, Federatën e Atletikës së Kosovës.

Lajmi është konfirmuar nga vetë federata ndërkombëtare në një komunikatë zyrtare të publikuar në faqen e saj në internet.

“Federata Ndërkombëtare e Atletikës shqyrtoi aplikimin e Federatës së Kosovës dhe gjykoi se i plotëson të gjitha kushtet e artikullit 4.3 të kushtetutës tonë, në këtë mënyrë ne e anëtarësojmë Federatën Kosovare të Atletikës me të drejta të plota në gjirin tonë”, është në njoftimin e Federatës Ndërkombëtare te Atletikës.

Kujtojmë se Federata e Basketbollit të Kosovës, pak javë më parë u bë anëtare e FIBA-së.

Pranimi i këtyre federatave vjen pasi që gjatë vitit të shkuar, Komiteti Olimpik Ndërkombëtar zyrtarizoi njohjen e Kosovës, vendim që i hapi rrugën shumë federatave të tjera të integrohen në federata përkatëse ndërkombëtare./Arbresh.info/