Presidenti i SHBA-së, Donald Trump, ka paralajmëruar Iranin me një përgjigje të ashpër ushtarake, duke deklaruar se Teherani do të përballet me goditje të fuqishme pas një tentative për sulm ndaj forcave amerikane në rajon.

Komentet e presidentit amerikan u bënë gjatë një interviste për rrjetin televiziv Fox News, vetëm pak orë pasi Shtetet e Bashkuara dhe Arabia Saudite zhvilluan operacione të përbashkëta ushtarake kundër milicive të mbështetura nga Irani në Irak.

Sipas Trumpit, operacionet ishin përgjigje ndaj sulmeve të mëhershme kundër pranisë ushtarake amerikane dhe objekteve strategjike të naftës në Arabinë Saudite. Ai tha se kishte ndjekur nga afër zhvillimin e operacionit, gjatë të cilit forcat amerikane neutralizuan raketat e lëshuara.

“Ne do t’i godasim deri në fund. Ata do të pësojnë një goditje të fortë. Ne do ta godasim fort Iranin në përgjigje të sulmeve të tyre kundër objektivave tona.”, tha Donald Trump, President i SHBA-së.

Trump shtoi se veprimet ushtarake në Irak u kryen në koordinim të plotë me autoritetet në Bagdad, pas provokimeve të regjistruara edhe në zonën kufitare me Jordaninë.

Reagimet në Irak

Zhvillimet e fundit kanë nxitur reagime në skenën politike irakiane. Kryeministri Ali Al-Zaidi shtyu vizitën e planifikuar në Riad, duke iu referuar përshkallëzimit të situatës.

Ndërkohë, përfaqësues të Forcave të Mobilizimit Popullor (PMF), të cilat ishin objektiv i sulmeve, i cilësuan veprimet si një “përshkallëzim mjaft të rrezikshëm”. Edhe ish-kryeministri Mohammed Shia al-Sudani shprehu shqetësim për pasojat që mund të ketë operacioni në stabilitetin e rajonit.

“Kjo përbën një tejkalim të rrezikshëm të parimit të vëllazërisë islamike.”, tha Mohammed Shia al-Sudani, ish-Kryeministër i Irakut.

Operacionet e fundit ushtarake kanë shtuar tensionet diplomatike në rajon, ndërsa forcat aleate mbeten në gatishmëri të lartë për çdo reagim të mundshëm nga Teherani.