Pas rizgjedhjes së Florentino Perezit në krye të Real Madridit dhe konfirmimit të afrimeve të Ibrahima Konates dhe Jose Mourinhos, klubi madrilen po vazhdon të punojë për përforcime të tjera të rëndësishme.

Megjithatë, një nga objektivat kryesorë të presidentit të Real Madridit, Josko Gvardiol, duket se po largohet nga “Santiago Bernabeu”.

Sipas raportimeve të BBC-së, Manchester City ka nisur negociatat për rinovimin e kontratës së mbrojtësit kroat, me synimin që ta mbajë atë në “Etihad Stadium” për një periudhë afatgjatë.

Edhe pse kontrata aktuale e Gvardiolit skadon në vitin 2028, drejtuesit e kampionëve anglezë dëshirojnë të sigurohen që 24-vjeçari të vazhdojë të jetë pjesë e projektit të klubit edhe në vitet e ardhshme.

Raportohet se bisedimet mes klubit dhe përfaqësuesve të lojtarit po ecin në drejtimin e duhur, ndërsa City beson se mund të arrijë marrëveshje të plotë gjatë kohës sa futbollisti është i angazhuar me Kroacinë në Kupën e Botës 2026.

Gvardiol iu bashkua Manchester Cityt në vitin 2023 nga RB Leipzig dhe shumë shpejt u shndërrua në një nga lojtarët më të rëndësishëm të skuadrës.

Ai u shpall lojtari më i mirë i Cityt për sezonin 2024/25, duke shkëlqyer si në qendër të mbrojtjes ashtu edhe në krahun e majtë.

Megjithatë, sezoni 2025/26 nuk ishte aq i suksesshëm për kroatin. Një dëmtim i rëndë në tibie që pësoi në muajin janar e la jashtë fushave për katër muaj, duke e kufizuar në vetëm 25 paraqitje gjatë sezonit.

Mbrojtësi u rikthye në dispozicion të skuadrës në tri javët e fundit të kampionatit, përpara se t’i bashkohej kombëtares së Kroacisë për përgatitjet e Kupës së Botës.

Nëse Manchester City arrin të finalizojë rinovimin e kontratës, shanset e Real Madridit për ta transferuar Gvardiolin do të zvogëloheshin ndjeshëm, duke e detyruar klubin madrilen të kërkojë alternativa të tjera në merkato./Arbresh.info