Federata e Futbollit e Kosovës (FFK) ka bërë të ditur se një delegacion i saj, i udhëhequr nga presidenti Agim Ademi, ka vizituar familjen e futbollistit Fatjon Bunjaku, i cili humbi jetën në një aksident trafiku.

Në delegacion kanë qenë edhe nënkryetari Bakir Burri, anëtari i KE-së Samir Ujkani dhe drejtori i Kombëtares Muharrem Sahiti.

Gjatë vizitës, presidenti Ademi i ka shprehur ngushëllimet më të thella familjes Bunjaku në emër të Federatës së Futbollit të Kosovës dhe gjithë komunitetit të futbollit, duke theksuar se ndarja e parakohshme nga jeta e Bunjakut ka prekur thellë opinionin sportiv në vend.

Sipas FFK-së, Fatjon Bunjaku do të kujtohet si një futbollist i përkushtuar, me ëndrra të mëdha dhe dashuri për futbollin, ndërsa familjes i është shprehur mbështetje në këto momente të vështira.

Gjatë vizitës, babai i futbollistit i ka dhuruar presidentit Ademi fanellën me numrin 9, të cilën Bunjaku e kishte përdorur gjatë paraqitjeve të tij me Kombëtaren U21 të Kosovës.

FFK ka ngushëlluar familjen Bunjaku, bashkëlojtarët dhe gjithë komunitetin sportiv, duke ndarë dhimbjen për humbjen e tij të parakohshme.