Të paktën 49 persona kanë vdekur nga etja në një pjesë të largët të shkretëtirës së Saharasë në veri të Nigerit, pasi kamioni me të cilin po udhëtonin u prish, kanë konfirmuar autoritetet lokale.

Grupi po kthehej nga Mali, ku kishte marrë pjesë në një festival mysliman. Ata mbetën të bllokuar pa asnjë pikë ujë më shumë se 80 kilometra në perëndim të Assamakës, pikës kryesore kufitare mes Nigerit dhe Algjerisë.

“Udhëtarët u gjendën të bllokuar në zemër të një mjedisi armiqësor, ku temperaturat ekstreme dhe mungesa e pikave të furnizimit e bëjnë mbijetesën jashtëzakonisht të vështirë”, thuhet në deklaratën zyrtare të guvernatorit të rajonit Agadez.

Tragjedinë e kanë mbijetuar vetëm dy burra. Ata arritën të ecin dhjetëra kilometra nëpër shkretëtirë deri në Assamaka, ku njoftuan autoritetet dhe treguan çfarë kishte ndodhur.

Sipas informacioneve nga zyra e guvernatorit, kamioni ishte nisur nga qyteti malian Telhandeke, por kishte devijuar nga rruga e planifikuar. Shoferi, ndihmësi i tij dhe pasagjerët për ditë të tëra u përpoqën pa sukses të riparonin mjetin. Në fund mbetën pa rezerva uji, raporton BBC.

Ekipi i shpëtimit, i dërguar urgjentisht nga autoritetet lokale, ka gjetur një pamje tronditëse. Dhjetëra trupa të pajetë u gjetën nën kamionin e palëvizshëm, ku njerëzit kishin tentuar të gjenin hije, si dhe në zonën përreth mjetit. Viktimat u varrosën në vendin e ngjarjes, në varreza masive.