Belgjikë– Një aksident tragjik ka ndodhur mëngjesin e kësaj të marte në Bougenhout, ku një autobus me nxënës u përplas me një tren në një kryqëzim hekurudhor, duke shkaktuar katër viktima.

Sipas mediave belge, mes viktimave janë dy adoleshentë, shoferi i autobusit dhe një tjetër i rritur. Lajmi u raportua nga RTL, duke cituar ministrin belg të Transportit.

Zëdhënësja e policisë federale belge, Anne Berge, deklaroi se në autobus ndodheshin shtatë nxënës, shoferi dhe një asistente. Ajo konfirmoi se asnjë prej pasagjerëve të trenit nuk ka mbetur i lënduar nga përplasja.

Ngjarja ka tronditur opinionin publik në Belgjikë dhe reagimet nuk kanë munguar edhe nga institucionet europiane.

Presidentja e Komisioni Evropian, Ursula von der Leyen, shprehu ngushëllimet për viktimat dhe familjet e tyre.

“Evropa vajton me Belgjikën. Zemra ime dhemb për aksidentin tragjik. Ngushëllimet e mia familjeve të viktimave dhe të dashurve të tyre”, deklaroi Von der Leyen.