Presidenti amerikan, Donald Trump, ka paralajmëruar Iranin se SHBA-ja do ta “përfundojë punën”, nëse Teherani nuk pranon kushtet amerikane për një marrëveshje që synon t’i japë fund luftës dhe të adresojë programin bërthamor iranian.

“Ose ata bëjnë gjënë e duhur, ose ne e përfundojmë punën”, deklaroi Trump përpara nisjes së tij për një vizitë në Kinë, vend që ruan marrëdhënie të forta me Iranin dhe mbetet një nga konsumatorët kryesorë të naftës iraniane.

Trump hodhi poshtë gjithashtu pretendimet se shqetësimet ekonomike apo rritja e çmimeve në SHBA po ndikojnë në qëndrimin e tij ndaj konfliktit.

“Nuk po mendoj për gjendjen ekonomike të amerikanëve. Po mendoj vetëm për një gjë: nuk mund ta lejojmë Iranin të ketë një armë bërthamore”, tha ai.

Sipas presidentit amerikan, çështja kryesore mbetet ndalimi i Iranit për të zhvilluar armë bërthamore, pavarësisht ndikimit që tensionet mund të kenë në tregjet globale dhe ekonominë amerikane.

Trump: “Nuk kemi nevojë për ndihmën e Kinës”

Presidenti amerikan u shpreh se SHBA-ja nuk ka nevojë për ndërmjetësimin apo ndihmën e Kinës për të zgjidhur konfliktin me Iranin.

“Nuk mendoj se kemi nevojë për ndihmë me Iranin. Ne do ta fitojmë këtë në një mënyrë ose në një tjetër, në mënyrë paqësore ose ndryshe”, deklaroi Trump.

Ai shtoi se Uashingtoni e ka situatën “nën kontroll shumë të ngushtë” dhe përsëriti se alternativa për Iranin mbetet ose marrëveshja, ose përballja me pasoja të rënda.

Irani refuzon të tërhiqet

Nga ana tjetër, Irani ka mbajtur një qëndrim të ashpër ndaj kërkesave amerikane. Kryenegociatori iranian, Mohammad Bagher Ghalibaf, deklaroi se SHBA-ja duhet të pranojë planin me 14 pika të propozuar nga Teherani.

“Nuk ka alternativë tjetër përveç pranimit të të drejtave të popullit iranian, siç përcaktohen në propozimin me 14 pika. Çdo qasje tjetër do të jetë krejtësisht e pafrytshme”, shkroi ai në platformën X.

Ghalibaf paralajmëroi gjithashtu se zvarritja e negociatave do të ketë kosto të larta për SHBA-në, ndërsa çmimet globale të naftës vazhdojnë të mbeten të larta.

Konflikti, i cili shpërtheu më shumë se dy muaj më parë pas sulmeve SHBA-Izrael ndaj Iranit, ka përshkallëzuar tensionet në të gjithë Lindjen e Mesme dhe ka ndikuar në ekonominë globale, veçanërisht në tregun e energjisë.

Edhe pse armëpushimi mbetet ende në fuqi, të dyja palët kanë refuzuar të bëjnë lëshime dhe kanë paralajmëruar vazhdimisht për rifillim të luftimeve. Megjithatë, deri tani as SHBA-ja dhe as Irani nuk duken të gatshëm për një përballje të plotë ushtarake.